Արշավի կարգախոս մշակվեց․ այն էր «Սիրո ցնցումներ փոքր քաղաքում»՝ ակնարկելով այն, որ այս թեման մեծ իրարանցում էր առաջացրել մեր փոքր քաղաքում: Գաղափարի հիմքում ընկավ զույգերին սիրահարեցնող չարաճճի Կուպիդոնը, ով իր սիրո նետն էր արձակել Դալմա Գարդեն մոլում և տարածքում առաջացրել սիրո ցնցումներ:

Քաղաքում տեղադրվեցին բիլբորդեր և սքրոլերներ՝ մշակված սլոգանով և համապատասխան վիզուալով: 

Դալմա Գարդեն մոլի ողջ տարածքի թեմատիկ ձևավորման կոնցեպտի հիմքում դրեցինք «ցնցումներ» առաջացրած ու սրտի մեջ մխրճված Կուպիդոնի նետը: Տեղադրվեցին թեմատիկ սիրո անկյուններ, որոնք միջոցառումների օրերին ապահովեցին հաճախորդների ինտերակտիվ մասնակցությունը: Սիրահար զույգերն այստեղ կարող էին համբուրվել, վիճել, հաշտվել, անգամ իրար ծեծել (սիրով) և իհարկե լուսանկարվել:  

Հատուկ միջոցառումներ կազմակերպեցինք Սուրբ Սարգսի և Սուրբ Վալենտինի տոների կապակցությամբ: Սուրբ Սարգսի տոնի նախօրեին Դալմայի այցելուներին բաժանվեցին աղի բլիթներ, իսկ բուն տոնական օրը հագեցած էր զվարճալի խաղերով, մրցանակներով և երաժշտությամբ: 

Իսկ Սուրբ Վալենտինի օրվա կապակցությամբ կազմակերպվեց գաղտնի ժամադրություն, որին մասնակցելու համար ստացանք ավելի քան 500 oնլայն հայտադիմում, և արդյունքում ձևավորեցինք 15 զույգ, ովքեր ռոմանտիկ ժամադրություն ունեցան Դալմայի սրճարաններից մեկում, ուր նրանց սպասվում էր համեղ հյուրասիրություն: Արշավի ողջ ընթացքում Դալմայի էջերի հետևորդները սոցցանցերում շատ ակտիվ հետևում էին արշավի զարգացմանը, արձագանքում և մեկնաբանություներ էին թողնում: